LAOAG CITY – Inbatad ti Department of Social Welfare and Development a palawaen ti ‘Trabaho sa Bagong Pilipinas job fair” para kadagiti benepisyaryo ti Pantawid Pamilyang Pilipino Program (4Ps) iti nagduduma a probinsya iti pagilian.
Daytoy ti inrakurak ni Pantawid Pamilyang Pilipino Program Social Marketing Division Chief Marie Grace Ponce.
Kuna na a ti job caravan ket gagem na a matulungan dagiti graduating households nga agikkaten iti programa a makabiruk ti trabaho.
Maipalagip nga idi 2019 ket napagbalin a naan-anay a linteg ti Republic Act No. 11310 wenno ti 4Ps Act.
Inpetteng ni Ponce a nalawag iti naipalaon iti linteg a dagiti benepisyaryo ti Pantawid Pamilyang Pilipino Program ket agingga da laeng iti 7 a tawen.
Ti Trabaho sa Bagong Pilipinas job fair ket inorganisar ti Department of Social Welfare and Development iti pannakitinnulong ti Department of Labor and Employment (DOLE) ken dadduma pay nga ahensya ti gobyerno, tapno mangipaay t tulong kadagiti benepisyaryo iti programa a maipaayan ti oportunidad a makapagtrabaho.
Iti babaen ti Trabaho sa Bagong Pilipinas para iti Pantawid Pamilyang Pilipino Program ket mangnamnama ti ahensya a dagiti graduating 4Ps households ket maipaayan ti trabaho tapno saan dan nga agsubli nga agpasar iti kinarigat iti panagbiag.
