LAOAG CITY – Naipaayan ti tracking device dagiti mangngalap iti Barangay Davila iti ili ti Pasuquin.
Daytoy ti inpakaammo ni Mr. Enrico Natusa Jr. iti Municipal Disaster Risk Reduction and Management Officer 3 iti nasao nga ili.
Segun ken ni Natusa, dagiti nasao a tracking devices a maaw-awagan ti “Alon” ket indonar ti Love Cast Company.
Inlawlawag na a ti “Alon” ket maysa a Global Positioning System (GPS) device a mainstular iti bangka dagiti mangngalap tapno mamonitor ti lokasyon wenno pagturungan na.
Innayon na a ti nasao a device ket addaan pay ti “Save Our Ship” no sadinno nga otomatiko nga agsend iti mensahe iti nakaiprogramaan ti device.
Inpakaammo na nga adda ti lima a pakaidanunan ti mensahe, kas kadagiti otoridad, Municipal Disaster Risk Reduction and Management Office, ken tallo a kabagyan ti akinbagi ti bangka.
Babaen iti nasao a device ket al-aliston a mabirukan wenno matulungan no adda ti mangngalap a mapukaw wenno maperdian ti bangka kabayatan ti kaadda da iti baybay.
