LAOAG CITY – Inbatad ni Speaker Ferdinand Martin G. Romualdez a masapol nga agpalawag dagiti trader ken middleman mainaig iti nangato a presyo dagiti produkto a pang-agrikultura uray nababa ti farm gate price.
Inaramid daytoy ni Romualdez iti panagtultuloy ti imbestigasyon ti Committee on Trade and Industry.
Inpetteng ni Speaker Romualdez nga agsungbat dagiti mapaneknekan a nanggundaway iti pannakaipangato ti presyo dagiti magatgatang tapno dumakkel ti mapastrek da a nangitunda ti panagrigrigat dagiti ordinaryo nga aggatang.
Inkari ni Speaker Romualdez a paawagan da dagiti trader ken middlemen tapno pagsaludsudan no apay a nagdakkel ti gidyat iti presyo dagiti magatgatang uray nababa ti farm gate price.
Immunan nga inrakurak ni Romualdez a nadismaya iti panangadmitir dagiti opisyal ti Department of Agriculture (DA) at Department of Trade and Industry (DTI) nga awan ti alisto a pangsolusyon da iti isyu.
Inpalgak ni Romualdez a masapol a malapdan ti dumakdakkel a gidyat ti farm gate price ken retail price para iti pagsayaatan dagiti mannalon ken konsumer.
Inpaganetget ni Speaker Romualdez saan a puro ti kadakkel ti mapastrek ti panpanunuten dagiti negosyante no di ket ikonsiderar met ti ado a pamilya a marigrigatan iti ar-aramiden da.
