LAOAG CITY – Inlawlawag ni Mr. Rodolfo Tauyan, maysa a traffic aide ditoy ciudad ti Laoag no anya ti napasamak iti pannaka-picture da a maipagarop a nakababa ti face mask da.
Segun kenni Tauyan, nasapa ti duty da ken adda ti nangited kadakuada ti kape rason a nagpaigid da iti kalsada ken inpasigurado na a nasurot da kadagiti kakadwa da ti social distancing.
Inistorya na a kabayatan ti panagkape da ket limmabas ti maysa a personalidad ken maipagarop a pinagsawsaw-an na dagiti maseknan gapo ta nakababa ti face mask da.
Gapo iti daytoy, inpalawag da ti rason no apay a nakababa ti face mask da ngem maipagarop a saan a dinegngeg ti maseknan ken inalaan na ida ti ladawan.
Mainaig iti daytoy, kunana a nasakit ti nakem da gapo iti pinagsasao ti maseknan kadakuada nangruna ket ammo da nga awan ti basol da.
Kunana pay a masansan a kastoy ti maar-aramid kadakuada a mabugbugkawan ken maak-akusaran nga aglablabsing iti pagannurutan.
Inpetteng na a saan kuma lattan a naipost daytoy iti social media no diket inreport na ida iti opisina da ken no mapaneknekan a nagbasol da wenno adda ti liway da ket sitatal-lugod a mangawat no masuspenso man daytoy.
