LAOAG CITY – Naiget a naglikudan ni Traffic Aide Manayun Guira ditoy ciudad ti Laoag ti alegasyon kenkuana a maipagarop a nagsubli-subli a napan nakitransaksyon tapno gumatang ti ado nga arak iti maysa a mall iti sentro ditoy ciudad kabayatan a nakaduty.
Inbatad na nga awan ti kinapudno na ti alegasyon kenkuana gapu ta saan nga umin-inom ti arak ken uray ti agsigarilyo.
Inbaga na a mapmapan da iti nasao a mall gapu ta isu ti asideg a paggatangan da no makainom da wenno gumatang ti mabalin da nga ipauneg kabayatan a nakaduty da.
Inadmitir na a no sumrek da iti nasao a pasdek ket agtalinaed da iti uray maysa laeng a minuto tapno palamiisen ti bagida gapu ta napalalo ti kinabara na iti ruwar nga ayan da.
Gapu iti daytoy, immapela ni Guira kadagiti tattao a saan da koma a basta alaan dagitoy ti ladawan ken iyaramidan ti istorya a mabalin a pakaperdian da.
