LAOAG CITY – Naglikudan ni Mr. Albert Aquino, maysa a traffic enforcer ditoy ciudad ti Laoag ti alegasyon kenkuana mainaig iti panagpila dagiti tricycle drivers.
Sungbat daytoy ni Aquino iti naawat ti Bombo Radyo Laoag a reklamo wenno akusasyon kontra kenni Aquino nga iparit na nga agpila dagiti tricycle drivers iti terminal da iti lauden ti Laoag City Commercial Complex, ken ti maipagarop a panagdawat na ti dua a pisos iti kada byahe dagiti drivers.
Segun kenni Aquino, no anya ti bilin ti opisina da ket isu met ti ar-aramiden na wenno ipatpatungpal na.
Inlawlawag na a saan a mabalin nga agpila dagiti traysikelan iti laud ti tiendaan tapno saan a makaitunda ti trapiko, ken ti naituding a pagpilaan da ket iti abay ti fast food chain.
Kunana pay a binagaan na dagiti traysikelan a no kayat da ti agpila iti nasao a lugar ket mapan da iti opisina tapno makisarita.
Mainaig met iti alegasyon nga agdawdawat ti dua a pisos, inpetteng na nga agpabigbig ti mangak-akusar kenkuana tapno agsango da ken maamoan ti pudno.
Kinarit pay ni Aquino ti presidente ken bise presidente ti asosasyon iti nasao a terminal tapno agsasarita da iti opisina ken malawlawagn ti isyu.
