LAOAG CITY – Ngumato ti transmission charges ita a bulan ti Pebrero gapu iti nangatngato nga ancillary service costs.
Inbatad ti National Grid Corp. of the Philippines (NGCP) a ti overall transmission charges ket ngimmato ti P1.3504 per kilowatt hour (kWh) manipud iti P1.2583 idi Disiembre 2024 billing period.
Ti apagapaman a panagngato ket gapu iti panagngato ti adjustment a nakita iti ancillary service charges wenno balor ti elektrisidad a naggapu iti reserve market ken providers nga addaan ti bilateral contracts iti National Grid Corp. of the Philippines.
Inlawlawag ti kompania a ti rates para iti period a karaman iti first wave ti koleksion ti 70% ancillary service charge a saan a sinigir ti generators sipod iti napalabas a tawen.
Maipalagip a nangited ti “go signal” ti Energy Regulatory Commission (ERC) para iti power generators a makarekober ti pakabuklan a P3.05 billion, mangipasimudaag iti nabatbati a 70% ti preserve trading amounts.
Immunan a sinuspenso ti komision ti koleksion ti balor iti reserve market kageddan ti panagngato ti presio.
