LAOAG CITY – Inpasigurado ni Presidente Ferdinand Marcos Jr. iti publiko a ti gakat a PhP6.793 trilyon para iti 2026 national budget ket matingiting ken mapirmaan sakbay nga agngudo ti tawen kas basar iti Malacañang.
Inpetteng ti Malacañang a ti pundo ket nasken a nakapokus kadagiti ipangpangruna ti administrasion ken agtalinaed a nakasentro kadagiti umili.
Inbatad ni Presidential Communications Office Undersecretary ken Palace Press Officer Claire Castro a dagiti opisial manipud iti Ehekutibo ket saan nga agbakasion tapno masigurado ti mailunglungalong a General Appropriations Act ket naiget a maadal.
Kunana a mangiwayat ti bukud a panangtingiting ti Ehekutibo tapno ad-adda a maprotektaran ti integridad ti pundo.
Inlawlawagna a nagtalinaed nga openness wenno panagbalin a silulukat ni Presidente Marcos ken dinakamatna ti Transparency Portal initiative ti Presidente a mangipapaay ti access iti publiko kadagiti proseso ti bidding ken procurement ti gobierno.
Manamnama nga aprobaran ti Congressional Bicameral Conference Committee ti 2026 a nailian a pundo inton Disiembre 28 ken agsina daytoy a ratipikaran ti House of Representatives ken Senado inton Disiembre 29 sakbay nga isubmitir iti Malacañang.
