LAOAG CITY – Natratar iti panagusar ti sarita nga Ingles ken Filipino kas maysa a kangrunaan a lenggwahe nga us-usaren iti Pilipinas, iti umuna nga Status Conference ti kaso ni dati a Presidente Rodrigo Duterte iti International Criminal Court (ICC),
Segun iti prosecution panel, napateg nga ad-adda a maawatan dagiti Pilipino ti sibubukel a proseso ti panangusig, aglalo ti naiget a banbantayan ti publiko dagiti mapaspasamak iti kaso.
Mainaig iti daytoy, pabor ti International Criminal Court a mangilatang ti interpreter para kadagiti testigo kontra ken ni Duterte tapno maitaros iti lenggwahe da dagiti diskusyon a mapaspasamak iti uneg ti trial.
Inbatad met ti kampo ni Duterte a saan nga agkasapulan ti interpreter ti kliyente da.
Kabayatanna, inpakaammo ni Presiding Judge Joanna Korner nga intono nobyembre ita a tawen ti schedule ti International Criminal Court Trial Chamber III para iti kaso a crimes against humanity a sangsangwen ni Duterte.
Tingitingen pay a naimbag ti resulta ti baro nga assessment ti tallo nga accredited experts ti International Criminal Court mainaig iti salun-at ti dati a presidente para iti sumagmamano a konsiderasyon.
