LAOAG CITY – Paayaban ti PNP-Traffic Division ditoy ciudad ti Laoag ti tricycle driver a nakapatennag ti pasahero na iti paset ti Barangay 27 ditoy ciudad idi aldaw ti domingo, Agosto 22 ita a tawen.
Daytoy ti inbatad ni Police Executive Master Sergeant Ferdinand Santos, ti mangidadaulo ti PNP-Traffic Division ditoy ciudad ti Laoag.
Inbatad ni Santos a paayaban da ti tricycle driver tapno pagpalawagen da no apay a nagilugan iti nasursurok ngem maysa a pasahero no sadinno a ti natennag a pasahero na ket pinagyan na iti likudan na.
Inpetteng ti opisyal nga ita a panawen ti pandemya a gubuay ti covid-19 virus ket naiget ti pammilin kadagiti traysikelan a malimitaran laeng ti maysa a pasahero ti mabalin da nga ilugan.
Innayon na a maipaayan ti driver ti citation ticket nga overloading gapu iti panagilugan na iti nasursurok ngem maysa a pasahero no sadinno a ti biktima ket pinagtugaw na iti likudan na.
Kabayatanna, kuna ni Santos a masapol a mapan dumatag a personal ti pamilya ti biktima iti opisina da tapno pagsasaritaan da ti napasamak.
Maipalagip a gapu iti pannakatennag ti pasahero a maysa a balasitang ket nagsagaba ti sugat iti ulo na nga iti agdama ket agpapalaing pay laeng iti ospital.
