LAOAG CITY – Inpakaammo ni Police Senior Master Sergeant Eric Bumagat, ti mangidadaulo iti Philippine National Police – Traffic Division ditoy siudad ti Laoag nga adda ti naawatna a tawag manipod ken ni Atty. Nikki Pilar, ti mangidadaulo iti Metro Ilocos Norte Council ti gobierno probinsial.
Inbatadna a maibasar iti insidente a naipadanon kenkuana ket agarup alas nuebe agingga alas nuebe y media ti bigat ket adda ti contingent ti Region 1 Athletic Association Meet manipod iti Dagupan, Pangasinan ti nangkontrata iti maysa a tricycle driver manipod ditoy siudad ti Laoag tapno gumatang ti sangasupot nga ice para kadakuada.
Kas sukat, naited ti 500 a pisos iti maseknan a tricycle driver tapno pagbayadna iti ipagpagatangda kenkuana.
Nupay kasta, agarup alas onse ti bigat ket saan pay a nagsubli ken in-deliver ti tricycle driver ti inpagatang dagiti contingent a manipod idiay Pangasinan.
Gapu iti daytoy, manarimaan ti panangisayangkat ti imbestigasion ti Metro Ilocos Norte Council maipapan iti nasao a banag.
Kabayatanna, inlawlawag ti maysa a tricycle driver a saan nga isuna ti maitudtudo a nangitaray ti 500 a pisos a bayad dagiti contingent manipod iti Pangasinan kalpasan a napaayaban daytoy iti Philippine National Police – Traffic Division ditoy siudad ti Laoag.
Inbatadna a nadismaya daytoy gapu ta arig naibabain isuna iti saanna met nga inaramid ti maipabpabasol kenkuana.
Kunana a nadalus ti konsensiana isu a saan daytoy a nagpangadua a napan nangilawlawag iti takderna maipanggep iti nasao a reklamo nangruna ket ti body number ti tricycle-na ti in-report dagiti maseknan nga agrekreklamo.
Innayonna a saan a makipilpila iti asideg ti Ferdinand Edralin Marcos Stadium no di ket iti Claveria Tours ti terminal a pagpilpilaanna nga agpasada.
