LAOAG CITY – Agtultuloy a maag-agasan iti Mariano Marcos Memorial Hospital and Medical Center iti siudad ti Batac ti maysa a tricycle driver kalpasan a nakuryente.
Nabigbig ti biktima a ni Reynaldo Agcaoili y Coloma, agtawen ti 59, naasawaan, maysa a tricycle driver, residente iti Brgy. 50 Buttong ditoy siudad ti Laoag.
Basar iti imbestigasyon dagiti otoridad, agtartarimaan ti biktima ken ti anak na a ni Raymond Julius Agacoili, agtawen ti 32, iti electric water pump iti asideg ti comfort room ti pagtaengan da.
Ig-iggaman ti biktima ti steel pipe nga agatiddog ti 18 a metro a maikamang iti water pump.
Saan a naripar ti biktima ken aksidente a naisagid na ti tubo iti maysa a linya ti Ilocos Norte Electric Cooperative a pagtar-tarayan ti 69 kiloVolts.
Naitaray ti biktima iti Laoag City General Hospital ngem naiyakar iti Mariano Marcos Memorial Hospital and Medical Center iti siuad ti Batac.
Basar kenni Police Senior Master Sergeant Eric Bumagat, iti PNP Laoag, addan iti nasayaat a kondisyon ti biktima.
