LAOAG CITY – Naipisuken iti Ilocos Norte Provincial Jail (INPJ) ditoy ciudad ti Laoag ti maysa a tricycle driver kalpasan a naarestar ken napilaan ti reklamo gapu iti panangharass na iti pasahero na a balasang nga agtawen ti 20 iti ili ti Vintar.
Nabigbig ti suspek a ni Christoper Ramos y Agcaoili, agtawen ti 25, baro, tricycle driver, drug surrenderer ken residente iti Barangay 9, Lubnac iti nasao nga ili.
Iti pannaka-arestar ti suspek ket nakakumpiskar dagiti otoridad iti ikot na ti maysa a sachet a naglaon ti napagango a bulong ti marijuana.
Gapu iti daytoy, naipilaan ti suspek ti reklamo nga acts of lasciviousness ken ti panagikot ti illegal a droga.
Immunan nga inlawlawag ni Police Corporal Mark Joseph Mamasig, imbestigador iti PNP iti ili ti Vintar, aggapo ti biktima
iti ciudad ti Batac ken nagpaitulnog ti balasang iti balay da iti Barangay 1, San Roque iti ili ti Vintar iti oras ti agarop alas-siete ti rabii idi disyembre 8.
Nupay kasta, basar iti palawag ti biktima, kabayatan ti kaadda da iti dalan ket maipagarop nga inap-aprusan ti suspek ti luppo na ken insiksiko na pa ti barukong na gapu ta nagyan ti balasang iti likudan na.
Ginandat ti balasang ti agresistir iti ar-aramiden ti suspek ngem maipagarop a pinangtaan na daytoy nga itapwak na kalpasan na ket inkarkaro na pay a pinataray ti tricycle.
Gapu iti nakaro a buteng ti biktima ket saanen a nagringgor, ngem idi nakadanun iti balay da ket inpulong na a dagus ti napasamak kenkuana.
Insigida a nagturong ti biktima ken nagannak na iti kwerpo ti pulisya tapno ireport ti napasamak, ket iti panagresponde iti balay ti suspek dagiti otoridad ket ditoy a maipagarop a naalaan da ni Ramos ti maysa a sachet a naglaon ti napagango a bulong ti marijuana.
Inbatad ni Mamasig nga addan dagiti immunan a nadamdamag da a kastoy nga aramid ti suspek isut gapu na a gutgutiguten da dagiti nagbalin a biktima na a dumatag da iti opisina da no kayat da ti agreklamo tapno inayun da iti naipilan a reklamo kontra ken ni Ramos.
