LAOAG CITY – Naarestar ti maysa a tricycle driver iti ili ti San Nicolas.
Daytoy ket kalpasan ti ballaigi a pannakaisayangkat ti anti-illegal drug buy-bust operation iti Brgy. 1, San Francisco iti nasao nga ili.
Segun ken ni Police Major Eduardo Santos, ti Hepe ti Philippine National Police iti ili ti San Nicolas, nabigbig ti suspek a ni Ravenan Gallardo y Lim a mas am-ammo iti nagan a Nonoy, agtawen ti 46, naasawaan ken residente ti nasao met laeng a Barangay.
Inbatadna a natiliw ti suspek kalpasan a maipagarup a naglako daytoy ti dua a heat-sealed transparent plastic sachet a naglaon ti maatap a shabu iti maysa a police poseur buyer.
Inlawlawagna a nakumpiskar iti suspek ti maysa a pedaso a sangaribu a pisos a nausar kas buy-bust money ken innem a pedaso ti one thousand peso bill a peke wenno boodle money.
Kunana a maibilang ti suspek kas Top 10 High Value Individual Regional Priority List ti Police Regional Office 1.
Mainaig iti daytoy, ballaigi ti pannakaisayangkat ti nasao nga operasion babaen ti nagtitipon a puersa ti Provincial Drug Enforcement Unit-Ilocos Norte Police Provincial Office, Philippine Drug Enforcement Agency, RID, National Bureau of Investigation-Ilocos Norte.
Kabayatanna, nagusar dagiti otoridad ti dua nga alternative recording device kabayatan ti pannakaisayangkat ti operasion.
