LAOAG CITY – Pimmusay ti maysa a tricycle driver kalpasan ti napasamak a pammaltog iti Sitio Corcuera, Brgy. Laureta iti ili ti Solsona.
Nabigbig ti biktima a ni Renato Ignacio y Garlejo, agtawen ti 41, naasawaan ken residente iti Brgy. Catangraran iti nasao nga ili.
Basar iti inisyal nga imbestigasyon dagiti otoridad, nagsagaba ti biktima iti sumagmamano a tama ti bala ti paltog iti nagduduma a paset ti bagi daytoy partikular iti ulo ken buksit.
Mainaig iti daytoy, basar iti innuman ti Bombo Radyo Laoag iti saanen a nagpabigbig a residente iti Brgy. Laureta, nakanggeg da ti innem agingga iti pito a putok ti paltog.
Kuna na nga apaman a rimuar iti pagtaenganda ket dita a nakita na ti maysa a lalaki a nakasuot ti agmaris ti orange a t-shirt ken nagtartaray iti abagatan a direksyon.
Inbatad na a kageddan daytoy ket nakita na met ti biktima a naregreg iti kali manipod iti inturong na a tricycle ken naisadsad iti wanga-wangan ti imburnal.
Rumrumuar a ti suspek ket mismo a pasahero ti biktima.
Kabayatanna, awan met ti ammo a rason ti live-in partner ti biktima tapno mapaltu-paltogan daytoy gapu ta awan dagiti kariri na.
Nu pay kasta, inpakaammo na a nagbalin a coordinator iti nangabak a mayor iti ili ti Solsona ti asawa na idi eleksyon.
Iti agdama, agtultuloy ti naun-uneg nga imbestigasyon dagiti otoridad iti nasao a pammaltog kasta met iti pannakaduktal dagiti posible a motibo iti krimen.
