LAOAG CITY – Maob-obserbaran iti ospital ti driver ti tricycle kalpasan a nasapgud ti maysa a Pick-up iti national highway a paset ti Barangay Billoca iti ciudad ti Batac.
Daytoy ti inbatad ni Police Major Artemio Clemente, ti OIC chief of police iti ciudad ti Batac.
Inbaga ni Clemente a ti driver ti tricycle ket agtawen ti 50 ken taga Barangay Billoca idinto a ti driver ti pick-up ket agtawen ti 74, residente iti Barangay Baay iti met laeng nasao a ciudad.
Kuna na nga agpada nga agpapaamyanan ti dua a lugan ken iti panag-left turn ti tricycle ket isu met ti panag-overtake ti pick-up.
Gapu iti daytoy, naipakanal ti tricycle kalpasan a nasapgud ti pick-up rason met ti nakasugatan ti driver ti tricycle ken nagasgasan ti siko ti maysa a pasahero na.
Inpakaammo ni Clemente nga agpapan ita ket saan pay a nakapagsasarita ti dua a partido.
