LAOAG CITY – Naarestar ti maysa a tricycle driver iti naiwayat nga Entrapment Operation iti Barangay 23 ditoy siudad ti Laoag.
Nabigbig ti suspek a ni Jay Agbayani, agtawen ti 48, naasawaan ken residente ti Barangay 5 San Ramon iti ili ti Vintar idinto a dagiti biktima ket dua a menor edad a babai nga agpada nga agtawen ti 13 ken taga ditoy siudad.
Naiwayat ti nasao nga Entrapment Operation kalpasan a nagkamang iti kuerpo ti pulisia dagiti menor de edad no sadinno a maipagarup a butbutngen ti suspek dagiti biktima.
Basar iti Laoag City Police Station, nakipagkinnita ti suspek kadagiti biktima iti maysa nga hotel iti Barangay 23 ditoy siudad ti Laoag ken apaman nga immasideg ti suspek kadagiti biktima ket insigida a kinemmeg dagiti otoridad ti suspek.
Naammoan a kabayatan ti panagkapkap dagiti otoridad iti suspek ket ditoy a naala ti dua nga heat sealed transparent plastic sachet a naglaon ti maipagarup a shabu.
Mainaig iti daytoy, naiget a naglikudan ti suspek a kukuana dagiti kontrabando a nakumpiskar dagiti otoridad kenkuana.
Kabayatanna, inpakaammo ti suspek a nabayagen nga am-ammona dagiti biktima babaen ti online ken saanna nga inpagarup a menor de edad dagitoy.
Iti agdama, adda iti pagbaludan ti suspek ken manamnama a mapilaan ti kaso gapu iti panaglabsingna iti Republic Act No. 7610 Special Protection of Children Against Abuse, Exploitation and Discrimination Act ken Republic Act No. 9165 Comprehensive Dangerous Drugs Act of 2002.
