LAOAG CITY – Naarestar ti maysa a tricycle driver iti buy-bust operation iti Barangay 7 iti ili ti Sarrat.
Ti suspek ket maysa a lalaki nga agtawen ti 37 ken residente ti Barangay 6 iti ili ti San Nicolas.
Nakumpiskar manipud iti suspek ti maysa nga heat sealed transparent plastic sachet a naglaon ti maipagarup a shabu nga agdagsen ti .08 gram nga agbalor ti Php 5,440.00 ken tallo nga heat-sealed transparent plastic sachet a naglaon ti maatap a shabu nga agdagsen ti 2.4 grams nga agbalor ti Php 16, 320.00.
Malaksid iti daytoy, naala pay manipud iti suspek ti tallo nga heat sealed transparent plastic sachet a naglaon ti mapapati a shabu nga agdagsen ti 2.4 grams nga agbalor ti Php 16,320.00 a narekobre iti compartment ti tricycle, maysa ribu a pisos a nausar kas buy-bust money ken dadduma pay.
Kabayatanna, manamnama ti pannakaipila ti kaso kontra iti suspek gapu iti panaglabsingna iti Sections 5 ken 11 ti Article II ti Republic Act No. 9165 wenno ti Comprehensive Dangerous Drugs Act of 2002.
