LAOAG CITY – Ibilang ni Police Chief Inspector Paul Benedict Parado, chief of police ti PNP-San Nicolas a nasolbaren ti napasamak a pammaltog iti Barangay 2 iti nasao nga ili.
Daytoy ket kalpasan a natiliw da met laeng ti suspek a ni Angelito Gaddao y Agustin, adda iti umno a tawen ken residente iti Barangay 7 iti met laeng nadakamat nga ili.
Nabigbig met ti biktima a ni Wildel Lucas, adda iti umno a tawen ken residente ti Barangay 14, San Nicolas, Ilocos Norte.
Segun kenni Parado, adda dagiti naibaga ti suspek a detalye iti krimen ken inadmitir na ti inaramid na.
Inlawlawag na a nagasat ti nagbalin a biktima a maysa a tricycle driver gapo ta nagsagaba laeng ti gasgas wenno nakudisan ti abaga na.
Inbatad na a nakrekobre da ti maysa nga slug ken basar ti palawag ti suspek ket kalibre 38 ti paltog ti nausar.
Iti imbestigasyon dagiti otoridad, saan a natamaan ti biktima gapo ta idi kinalbit ti suspek ti paltog ket eksakto a nagdumog bayat ti panangdamag na no sadinno ti pagturungan ti pasahero na.
Kunana a basar ti suspek ket maipagarop a pinangtaan ti biktima isuna isut gapo na a naaramid na ti insidente.
