LAOAG CITY – Nadungpar ti maysa a tricycle ti dua a babbai iti paset ti Brgy. 33-A, Lapaz ditoy Siudad ti Laoag.
Segun ken ni PCpl. Artemio Magaoay Jr., Duty Investigator ti Philippine National Police Laoag Traffic Division, nabigbig ti driver ti tricycle a ni Antonio Guillermo y Bartolome, agtawen ti 50, naasawaan ken residente ti Brgy. 28, San Bernabe ditoy Siudad ti Laoag.
Nabigbig met dagiti biktima a da Violeta Borja y Mon, agtawen ti 57, naasawaan ken residente ti Brgy. 33-A, Lapaz ditoy Siudad ken ni Danica Bartolome y Asuncion, agtawen ti 38, naasawaan ken residente met laeng iti nasao a Barangay.
Inlawlawagna a basar iti naisayangkat nga imbestigasion, bayat a dumaldalyasat ti nangiturong ti tricycle nga agpa-daya ket dita a napukawan daytoy ti kontrol ti manibela iti saan pay a masinunuo a rason.
Nupay kasta, gapu iti daytoy ket dita a nadungparna dagiti dua a maseknan a babbai a magmagna iti kalsada kadayta a gundaway ken natulid dagitoy.
Kunana a nagsagaba ti sugat iti nagdumaduma a paset ti bagi dagiti maseknan a biktima ken naitaray iti Governor Roque Ablan Sr Memorial Hospital ni Borja idinto a ni Bartolome ket naiturong iti Karmelli Clinic and Hospital para iti naan-anay a pannakataming dagitoy.
Innayonna nga adda metten ti pakpakauna a panagsasarita ti dua a partido.
