LAOAG CITY – Inpaima ti maysa a trycicle driver iti PNP ti homemade shotgun a napidot na iti kakawayanan iti Barangay Monte iti ili ti Paoay.
Segun kenni Police Major Eddie Suyat, chief of police ti PNP-Paoay, ti tricycle driver ket agtawen ti 40, naasawaan ken residente iti nasao a barangay.
Inbatad ni Suyat a basar iti palawag ti driver, bayat a magmagna nga agawid idi malem ti Lunes ket adda ti nakita na a sako iti kakawayanan ken ditoy a nadiskubre na a paltog ti linaon daytoy.
Gapo iti daytoy, kuna ni Suyat nga idi kalman ket nagturong iti kwerpo ti pulisya tapno ipaima ti nasao a paltog.
Mainaig iti daytoy, inbatad na nga iyuswat da ti imbestigasyon tapno maamoan no siasinno ti nangibati ti paltog iti nasao a lugar.
Iti agdama ket adda iti kustudiyar ti PNP-Paoay ti paltog ken manamnama a maipadalan iti ballistic examination.
