LAOAG CITY – Natay ti maysa a lalaki kalpasan a pinaltogan ti saan pay a nabigbig a suspek iti Barangay 1, San Lorenzo ditoy siudad ti Laoag.
Basar iti Laoag City Police Station, nabigbig ti biktima a ni Felino Gubac Pascua Jr., agtawen ti 43, naasawaan, tricycle driver ken residente iti Barangay 32-A, Lapaz, ditoy siudad.
Nagsagaba ti biktima ti tama ti paltog iti akinkannigid a barukongna.
Naitaray ti biktima iti Gov. Roque B. Ablan Sr. Memorial Hospital ngem naideklarar a dead on arrival.
Insigida a naiwayat ti dragnet ken hot-pursuit operation para iti pannakatiliw ti suspek.
Rumrummuar a ti suspek ket maipagarup a nakabado ti army green jacket ken black shorts ken nakalugan ti Red Toyota Vios ken maipagarup a nagturong iti daya ti F.R. Castro Street ditoy siudad ti Laoag kalpasan ti insidente.
