LAOAG CITY – Kinumpirmaran ni Police Lt. Col. Rafael Lero, hepe ti PNP Laoag a pimmusay ti maysa a tricycle driver bayat a maag-agasan iti ospital idi malem kalman.
Inlawlawag na a napasamak ti desgrasya iti Brgy. 8 ditoy siudad iti crossing ti Panganiban St ken D. Samonte St.
Bayat nga agpapaabagatan ti tricycle ken addaan ti pasahero a masikog iti Panganiban Street ket dita a nasapgud ti driver ti Honda Civic nga agpadpadaya a direksiyon iti D. Samonte Street.
Kuna ni Lero a ti side wheel iti tricycle ti nasapgud ti kotse rason a nagpululigos ti daytoy ken naipurwak ti tricycle driver a poon a naitama ti ulo na iti semento.
Inbatad na a bayat a maag-agasan ti tricycle driver iti ospital ket naideklara a pimmusay iti agarup ala-una kuarenta y singko ti malem iti Setyembre 1, 2020 babaen ti physician.
Kabayatanna, saan met a nadangran ti driver ti kotse idinto a nasayaat ti kondisyon ti masikog.
Naamuan a ti pasahero ti tricycle ket naamuan na laeng a masikog daytoy kalpasan naeksamin iti ospital.
Agtultuloy ti imbestigasyon dagiti otoridad kalpasan ti desgrasya ken adda ti immunan a nagsaritaan ti pamilya ti biktima ken ti driver ti kotse.
