LAOAG CITY – Natay ti maysa a tricycle driver kalpasan ti panagdinnungparda iti nakamotorsiklo iti Barangay 7 San Miguel iti ili ti San Nicolas.
Segun ken ni P/Capt. Randy Damo, Hepe ti San Nicolas Municipal Police Station, nabigbig ti biktima a nangiturong ti tricycle a ni Rodrigo Asuncion, agtawen ti 59, naasawaan ken residente iti nasao a barangay.
Inbatadna a ti nangiturong met ti motorsiklo a Yamaha NMAX ket ni Marck Angelo Arcaperlas, agtawen ti 27, naasawaan ken residente ti Sitio Vicencio, Taleb, Bantay, Ilocos Sur.
Inlawlawagna a basar iti inwayatda nga imbestigasion, kabayatan a dumaldalyasat ti tricycle nga agturong nga agpa-laud ket kellaat daytoy a nag-left turn a mapan iti maysa a gasoline station a nangitunda ti panagdinnungparda iti motorsiklo.
Gapu iti daytoy, dagus a naitaray iti Black Nazarene Hospital iti ili ti San Nicolas ti nangiturong ti tricycle ngem naideklara a dead on arrival babaen ti attending physician a ni Dr. James Patrick Peralta.
Kabayatanna, naitaray met iti Mariano Marcos Memorial Hospital and Medical Center iti siudad ti Batac ti nakamotorsiklo kalpasan a nagsagaba ti sugat iti nagduduma a paset ti bagina.
