LAOAG CITY – Maisagsaganan ti maipila a reklamo kontra ti tricycle driver kalpasan a natiliw babaen ti naiwayat a drug buybust operation dagiti kameng ti PNP Laoag ken PDEA iti sango ti Ilocos Norte Centenial Arena iti Brgy. 5 ditoy siudad ti Laoag.
Nabigbig ti suspek a ni Lonejune Imperial, agtawen ti 38, ken residente iti Brgy 22 iti nasao a siudad.
Nakumpiskar dagiti otoridad ti maysa a plastic sachet a naglaon ti maipagarup a shabu ken ti marked money nga 1000 peso bill.
Sabali pay nga lima nga atitiddog a sachet a naglaon ti maipagarup a shabu, maysa nga light bulb improvised tooter nga addaan ti maipagarup a shabu residue, 370 a pisos, cellphone ken sabsabali nga drug paraphernalia.
Segun ti PNP, agdagup ti 0.8 grams ken agbalur ti 8 ribo a piso dagiti nakumpiskar a maatap nga iligal a druga.
Naipadalan ti suspek iti medical examination ken nagtalinaed iti kustudiyar ti PNP Laoag.
