Tiniliw dagiti otoridad ti maysa a tricycle driver iti naiwayat a drug buy bust operation iti Brgy. Aglipay iti ciudad ti Batac.
Nabigbig ti subject ti operasyon a ni Christopher Casuga, agtawen ti 44, tricycle driver ken residente iti Brgy. Magnuang iti nasao a ciudad.
Natiliw ti Casuga kalpasan a linakoanna ti maysa a sachet a naglaon iti maatap a shabu nga agbalor ti sangaribo a pisos iti nagpammarang a police poseur buyer.
Malaksid iti dayta, narekobre pay iti posisyon na ti dua a sachet a naglaon met laeng iti maatap a shabu.
Naglikudan ni Casuga dagiti alegasyon kontra kenkuana ken awan iti ammo na a rason a naiwayatan daytoy iti operasyon.
Inpetteng na a saan nga agus-usar wenno aglak-lako daytoy iti ilegal a droga.
Kunana a nagkedked a bigbigenna ti dati a karruba na nga adda iti pakainaigan na iti ilegal a droga idi dinamag daytoy dagiti otoridad kenkuana agsipod ta ammo nan iti ranta dagitoy.
Kunana a dati a kadkadwa ni Casuga ti tao a damdamagen dagiti otoridad kenkuana.
Inbatad na a kabayatan iti panangitulnog na ti pasahero na ket dita a sinada dagiti otoridad daytoy ken dinamag da no maysa a drug surrendee isuna a naglikudan na ket ditoy a dagus da isuna a pinosasan.
Kabayatanna, kinumpirmaran ni P/Maj Artemio Clemente, ti Deputy Chief of Police ti PNP Batac nga adda iti DI Watchlist ni Casuga a natiliw iti drug buy bust operasyon.
Segun kenni Clemente, maysa ni Casuga kadagiti agus-usar ken aglaklako iti ilegal a droga.
Kunana a nabayagen a monmonitoren dagiti kameng ti pulisya ti suspek ken kangrunaan a supsuplayan na ket iti ciudad ti Batac.
Naamoan a dati a jail guard iti Bureau of Jail Management and Penology-Batac ni Casuga ngem nag-AWOL idi 2011.
