LAOAG CITY – Inpasingked ni Rafael Labugen, agtawen iti 41, awanan iti asawa, tricycle driver ken residente iti Barangay 27 ditoy ciudad ti Laoag a naminpinsanen a tinallikudan na ti illegal nga aktibidad na.
Reaksyon na daytoy kalpasan a natiliw iti drug buy-bust operation ken maipagarop a nakaala dagiti otoridad iti ikot na iti 2 a babassit a sachet a naglaon ti maipagarop a shabu ken sangaribo a pisos a marked money.
Iti palawag ni Labugen iti Bombo Radyo Laoag, napan nagitulnog iti pasahero na iti Barangay Buttong ditoy ciudad ti Laoag ken iti panagawid na ket sinada dagiti uppat a nakasibilyan a kameng ti pulisya kalpasan na ket dagus da lattan a pinosasan.
Inpetteng na nga awan ti kinatran-tranksaksyon na ken saanna a kukua dagiti naala dagiti otoridad nga ebidensya kontra kenkuana.
Inadmitir na a drug surrenderer daytoy idi 2015 ngem sipud idi ket saannan a sinublianan ti illegal nga aramid na.
