LAOAG CITY – Natiliw ti maysa a tricycle driver iti naiyuswat a drug buy-bust operation iti Barangay Puyupuyan iti ili ti Pasuquin.
Nabigbig ti subject ti operasyon a ni Jimmy Agtuca, addaan ti umno a tawen, ken residente iti nadakamat a barangay.
Nakumpiskar dagiti otoridad iti ikot ni Agtuca ti tallo a sachet a naglaon ti maipagarop a shabu nga agbalor ti 2,500 a pisos.
Mainaig iti daytoy, inadmitir ni Agtuca a napadasan na ti nagusar ti illegal a droga idi adda paylaeng idiay Las Piñas, ngem sipud nagawid ditoy probinsya idi 2005 ket saan pulosen a nakaraman.
Inpetteng ni Agtuca a saanna a kukua dagiti naala iti ikot na nga illegal a droga ken saanna a kwarta ti 2,500 a pisos a naala iti pitaka na.
Basar iti Assistant Team Leader ti Philippine Drug Enforcement Agency (PDEA) a ni Agent Harry Cariño, ni Agtuca ket maibilang a Top 5 iti Drug Watchlist iti Provincial Level.
Kuna na nga agop-operar ti grupo ni Agtuca iti intero a probinsya.
Inpakaammo ni Cariño a basar iti panagmonitor da ket no mapan agpasada ni Agtuca ket dumagas metten iti ayan dagiti kakadwa na.
