LAOAG CITY – Masapol nga ipresentar dagiti tricycle drivers ti driver’s license ken ti photocopy na tapno makaawat da ti P5,000 cash aid manipod iti gobierno.
Daytoy ti inbatad ti Department of Social Welfare and Development (DSWD) kabayatan ti panangisagsagana ti ahensya ti inisyal a fuel hike assistance payout iti sumaruno a lawas.
Segun ken ni Department of Social Welfare and Development Spokesperson Irene Dumlao, adda ti 39 a payout sites iti intero a Metro Manila mangrugi intono Marso 17 ita a tawen.
Immunan nga inrakurak ti Department of Social Welfare and Development nga usaren da ti kagudwa ti P60-billion budget para iti Assistance for Individuals in Crisis Situations (AICS) tapno mapondoan ti cash aid program para kadagiti public utility vehicle drivers a kangrunaan a maapektaran iti panagngato ti presyo dagiti produkto a petrolyo gapu iti mapaspasamak a gubat iti Middle East.
Innayon na a nakasagana ti ahensya para iti nayun nga interbensyon no agpaot pay ti epekto ti panagngato ti presyo dagiti produkto a petrolyo.
