LAOAG CITY – Manamnama ti pannakaipasdek ti “triple A slaughterhouse” iti siudad ti Batac.
Inlawlawag ni Vice Mayor Albert Chua iti siudad ti Batac a daytoy a klase ti karnesilia ti kapintasan a pasilidad a bigbigbigen ti National Meat Inspection Service wenno NMIS.
Kinunana a ditoy a maipatungpal ti moderno a teknolohia, nangato nga standard ti sanitasion, otorisado a mangiproseso kadagiti karne ti baka, baboy ken dadduma pay a klase ti dingwen para iti pagilian ken iti “export market” wenno mailako iti sabali a pagilian.
Inlawlawagna a maitampok iti nadakamat a pasilidad dagiti otomatiko a makinaria, cold storage ken maidiayanto payen iti nadakamat a pasilidad ti panagsanay iti moderno a panagparti ti dingwen agsipud ta saanton a maipalubos a maaddaan ti kabukbukudan a partidor dagiti aglaklako ti karne gapu ta agbalinton dagitoy nga empleado ti gobierno iti siudad ti Batac.
Segun iti Bise Mayor, ti mausar a pundo ket ti “grant” nga inpaay ti Departamento ti Agrikultura kangrunaanna iti National Meat Inspection Service nga agdagup iti 166 a milyon a pisos a maipasdek iti aglawa iti maysa punto pito nga ektaria a lote ti gobierno iti siudad ti Batac iti Barangay 20 Colo.
Kunana nga addanto pay ti paset ti nasao a proyekto a “bio waste energy” a dagiti mausar ket dagiti awanen ti serserbina manipud kadagiti naparti a dingwen.
Mangnamnama ni Chua a dakkel ti maitulong daytoy nga ad-adda pay a maipaayan ti suporta dagiti Micro Small and Medium Enterprises wenno MSMEs ditoy probinsia.
