LAOAG CITY – Natiliw ti maysa a tricycle driver kalpasan a maipagarop nga intaray na ti bag a nabati ti pasahero na iti uneg ti tricycle na.
Immuna iti daytoy, nagreport iti PNP ti agnagan ti Filomena Ramos y Gaoiran, agtawen ti 76, balo ken residente ti Barangay 26 ditoy ciudad ti Laoag kalpasan a maipagarop nga intaray ni Narciso Lucas y Trumpo, agtawen ti 47, naasawaan, tricycle driver ken residente iti Barangay 55-A, Barit ti bag na.
Basar ti palawag ni Ramos, naglugan iti tricycle ni Lucas iti panagturong na idiay Barangay 24 iti ili ti Sarrat ken idi makadanon da iti lugar ket maipagarop nga intaray ti driver ti bag na.
Gapo iti daytoy, inyuswat dagiti otoridad ti manhunt operation kalpasan a naala ti plate number ti tricycle na.
Naarestar met dagiti otoridad ni Lucas iti paset ti Barangay Bengcag ditoy ciudad ti Laoag a pakairamanan ti bag a naglaon ti cellphone, alahas, dua a relo ken 450 a pisos.
Malaksid iti daytoy, nakumpiskar pay kenni Lucas ti maysa a plastic sachet a naglaon ti maipagarop a marijuana.
Mainaig iti daytoy, naglikudan ni Lucas ti alegasyon nga intaray na ti bag ni Ramos ken inpetteng na a saan nga agtatakaw.
Segun kenni Lucas, saan na nga ekspektaren nga adda ti bag ni Ramos a nabati iti uneg ti tricycle na kalpasan a tinulungan na a nangibaba dagiti karga ti pasahero na.
Inbatad na nga adda ti nagpara kenkuana ken nagturong iti Puregold ken idi bumaba da ket nakita na nga adda ti bag iti lugan na, inbaga na daytoy kadagiti babbai a pasaheros na ngem maipagarop a nagkakatawa dagitoy.
Gapo iti daytoy, kuna ni Lucas a nagamak iti panagkakatawa dagiti babbai isut gapo na nga inbelleng na ti bag ken saan na a linukatan.
Kunana a bayat ti panaggi-inom da ket simmangpet dagiti pulis ken ditoy a naibaga kenkuana ti alegasyon kontra kenkuana.
Basar kenkuana, bayat ti panagsukimat ti pulis ti wallet na ken idi naisubli kenkuana ket addan ti maipagarop a naikabil a marijuana.
