LAOAG CITY – Natayen ti biktima ti disgrasya iti paset ti national highway bisinidad ti Brgy.Paltit, Badoc, Ilocos Norte idi maitaray daytoy iti Mariano Marcos Memorial Hospital and Medical Clinic, Batac City.
Nabigbig daytoy a ni Jason Mark Bong Simon y Sambot, agtawen ti 59, naasawaan, maysa a mannalon, tubo iti Brgy. Magnuang, Batac City, Ilocos Norte ngem residente iti Brgy. Sta Cruz Norte, iti ili ti Badoc.
Basar iti inbestigasyon ti PNP Badoc, iturturong ni Simon ti maysa a pribado a tricycle awanan ti plate number, ket bayat nga agpapaabagatan a direksiyon, adda met ti red/white Mini Bus nga addaan ti marking nga IVAN DOMINIC (V2), ken Plate no. IAA 6673 a kukua ti agnagan ti Domingo Jaime Jr. y Ranjo, residente ditoy ciudad ti Laoag ken inturong ti agnagan ti Wilden Lorenzo y Agullana, agtawen ti 45 naasawaan ken residente ti Brgy. Caunayan, Pagudpud, Ilocos Norte nga agpapaamyanan a direksiyon.
Idi makadanon da iti asideg ti rangtay iti nasao a lugar, maipagarup a nga inovertekan ni Simon ti maysa a nakamotorsiklo.
Saan metten a nakontrol to driver ti mini bus ti manibela gapu ta nabigla nga adda metten iti sumubat kadakuada rason a napasamak ti panagdinungpar dagitoy.
Nagasagaba ni Simon ti sugat kadagiti nagduduma a paset ti bagi na kangrunaan iti ulo na.
Agpadpada met dagiti lugan nga adda dagiti dadael na.
Insigida met a simmuko ti driver ti mini bus kadagiti otoridad.
Agtultuloy pay laeng ti inberstigasyon ti pulisya seknan iti nasao nga aksidente.
