LAOAG CITY – Manarimaan paylaeng ti deliberasyon ti Korte Suprema ti petisyon a temporary restraining order ti transport groups nga indaulwan ti Pagkakaisa ng mga Samahan ng Tsuper at Operators Nationwide (PISTON).
Daytoy ti inbatad ni Supreme Court spokesperson Camille Sue Mae Ting iti baet a nalpasen ti April 30 a deadline para iti consolidation iti babaen ti Public Utility Vehicle (PUV) modernization program.
Kayat na a sawen ket no awan pay ti temporary restraining order nga inparuk-at ti Korte Suprema ket mabalin nga ituloy ti gobierno ti implementasyon ti Public Utility Vehicle Modernization Program ken ti consolidation deadline.
Immunan nga inbilin ti Korte Suprema nga agkomento dagiti respondents a pakairamanan ti Department of Transportation ken ti Land Transportation Franchising and Regulatory Board.
Kabayatanna, adda ti 10 ribo a jeep iti intero a pagilian ti mapagam-amkan a maibilang kas kolorum public utility vehicle gapu iti saan da a panagtungpal iti consolidation deadline.
Nupay kasta, kuna ni Land Transportation Franchising and Regulatory Board chairman Teofilo Gudiz, tungpalen da ti due process para kadagiti kolorum jeepneys wenno units nga awanen ti bisa ti prangkisa na, pakairamanan ti 600 agingga iti 700 a dyip iti Metro Manila.
Innayon na nga iti maikadwa a lawas ti Mayo nga i-tap da ti Land Transportation Office ken ti Philippine National Police tapno tiliwen dagiti colorum operators.
Mabalin a ma-impound dagiti matiliw a kolorum a lugan ken mamulta ti P50,000 a pisos.
