LAOAG CITY – Mabalin a Barangay Ginebra wenno San Miguel Beermen ti sumaruno a destinasyon ni Troy Rosario kalpasan nga opisyalen a pinaluspusan ti Blackwater Bossing tapno agbalin nga unrestricted free agent.
Naamoan nga inkarigatan ti Blackwater nga allukuyen ni Troy tapno agtalinaed iti grupo, kangrunaan na idi kalepleppas ti kampanya iti Governors’ Cup nga indaulwan dagiti prolific import nga isuda George King ken Rosario.
Iti babaen ti baro a pagannurutan ti PBA free agency, amin dagiti umaayam a na-draft manipod iti 2015 ket mabalin nga otomatiko nga agdeklarar ti unrestricted free agency kalpasan ti maikapito a season iti liga.
Basar kadagiti nasinged ken ni Rosario, ti 6-7 big man ket ad-adda nga interesado a makikappeng iti Ginebra, a maibagbaga a paborito na a team.
Kabayatanna, kalikagom pay ti Talk N Text a maala ni Rosario, ngem mapapati a bassit ti tiyansa na nga isu ti papanan ti nasao a basketbolista.
