LAOAG CITY – Natiliw ti maysa a truck driver iti naiyuswat a drug-buy bust operation iti Barangay 38-B, Mangato West ditoy ciudad ti Laoag.
Nabigbig ti suspek a ni Randy Ilustrisimo, agtawen ti 36, addaan ti live-in partner ken residente iti nadakamat a barangay.
Kinemmeg a dagus dagiti kameng ti Philippine Drug Enforcement Agency (PDEA) ti suspek kalpasan a naglako ti maipagarop a shabu iti nagpammarang kas poseur-buyer.
Nakumpiskar iti ikot ti suspek ti maysa nga heat sealed transparent plastic sachet nga agdagsen ti sumurok-kumurang a maysa a gramo ken ti buy-bust money a 7 ribo a pisos.
Inpakaammo ni Agent Harry Cariño a ti suspek ket rinugyan payleng ti Philippine Drug Enforcement Agency iti rehiyon uno a minonitor idi Nobyembre 2023.
Kinumpirmaran pay ni Cariño a ti suspek ket maibilang kas High Value Target ti ahensya.
Mainaig iti daytoy, kuna ni Cariño a basar iti monitor da, iti panagturong ni Ilustrisimo idiay Bulacan tapno agibiyahe ti feeds ket isu metten ti panangala na kadagiti maatap a shabu nga ilako na ditoy probinsya.
Immuna iti daytoy, ipetpetteng ti suspek nga awan ti inlako na nga illegal a droga ken inakusan na dagiti otoridad nga inmula da ti naala nga ebidensya kontra kenkuana.
