LAOAG CITY – Nagballaigi dagiti otoridad a nangtiliw ti maysa a truck driver iti naiyuswat a drug buy-bust operation iti paset ti Sitio Bantay, Brgy. 22, Boyboy iti ili ti Piddig.
Binigbig ni Police Capt. Rudy James Jacalne, ti chief of police iti ili ti Piddig, ti subject ti operasyon a ni John Mark Cabaya, agtawen ti 33, naasawaan, Truck Driver, drug surrenderer, maibilang kas High Value Target wenno Number 6 iti Provincial Priority Target ti Philippine drug Enforcement Agency (PDEA) ken residente iti Brgy. Laureta iti ili ti Solsona.
Kuna na tiniliw a dagus dagiti operatiba ti suspek kalpasan a naglako ti maysa a sachet a naglaon ti maipagarop a shabu nga agbalor ti 2 ribo a pisos.
Iti pannakakapkap ti suspek ket nakakumpiskar pay dagiti otoridad ti maysa a sachet a naglaon ti maipagarop a shabu.
Segun ken ni Jacalne, nabayag minonmonitor dagiti otoridad ti suspek gapu iti illegal nga aktibidad na agingga a naikkan da ti gundaway a nangisayangkaten ti operasyon.
Inpakaammo na pay nga immunan a natiliw ti kabsat ni Cabaya babaen met laeng iti drug buy-bust operation.
Patien ni Jacalne nga us-usaren ti suspek ti trabaho na nga agibibiyahe ti nagduduma a produkto no sadinno a ti rota na ket manipod Bulacan,Solsona ken Carasi no sadinno nga igiddan na metten ti agibiyahe ti illegal a droga ditoy probinsya.
Iti agdama, maisagsaganan ti reklamo a maipila kontra iti nasao a suspek.
