LAOAG CITY – Inawagan ni United States President Donald Trump a maysa a diktador ni Ukrainian President Volodymyr Zelensky.
Inakusaran pay ni Trump ni Zelensky nga isuna ti nangirugi ti gubat iti nagbaetanda ti Russia.
Inaramid ni Trump ti nasao a rakurak sumagmamano nga oras kalpasan nga inakusaran ni Zelensky ti Presidente ti Amerika nga agiwarwaras dagiti biddot nga impormasion ti Russia.
Inpetteng ni Trump a kalikagumna a malpasen ti gubat uray maawan dagiti teritorio ti Ukraine.
Mainaig iti daytoy, inlawlawag met ni Zelensky nga iti baet dagiti komento ni Trump ket dakkel latta ti respeto daytoy ken nakasagana a makikammayet iti peace deal.
Maipalagip nga iti napalabas a lawas ket tinawagan ni Trump da Zelensky ken Russian President Vladimir Putin.
