LAOAG CITY – Inkalintegan ni United States President Donald Trump iti panangiwarasna kadagiti National Guard idiay Los Angeles, California.
Inbatadna nga awan ti serbina dagiti mangidadaulo idiay California nga isuda Governor Gavin Newsom ken Los Angeles Mayor Karen Bass gapu ta saanda a makontrol dagiti tattao.
Simmungbat met Mayor Bass no sadinno nga agul-ulimekda laeng ngem nagbalin a riribuk idi adda ti naiwayat nga immigration raids.
Daytoy ket kalpasan a maipagarup a kellaat lattan nga inarestarda dagiti tattao a nangitunda ti nalawa a tignay protesta.
Dumanon met iti 100 a tattao ti inarestar dagiti kapulisan idiay Los Angeles gapu iti inaramidda a panagdadael kadagiti sumagmamano a pasdek ti gobierno.
Maipalagip a desidido ni California Governor Newsom a mangipila ti kaso kontra ken ni Trump gapu iti panangiwaras daytoy ti National Guard a saanda nga inpakpakaammo kadakuada.
