LAOAG CITY – Nagpangta ni United States President Donald Trump a mangipataw ti 50 a porsiento a taripa kadagiti amin a produkto nga aggapu iti European Union idinto a 25 a porsiento met kadagiti Apple products.
Inbatad ni Trump nga agingga a saan nga aramid wenno partuat ti Estados Unidos dagiti produkto ti Apple ket saanna nga isardeng ti panangipataw ti taripa.
Inpettengna nga awan ti pakaibanaganna dagiti nagsaritaanda iti European Union isu nga epektibo daytoyen inton Hunio 1 ti panangipataw ti 50 a porsiento a taripa.
Naammoan a saan nga immannugot ni Trump iti European Union no sadinno nga ipilpilitda ti zero percent ken saan a kimmanunong iti 10 a porsiento a baseline-tax ti Estados Unidos.
Maipalagip a naruay a lider ti pagilian ti nakisarita ti personal ken ni Trump gapu iti pangta daytoy a nangato a taripa no sadinno nga ikidkiddawda iti Presidente ti Estados Unidos a kissayan daytoy.
