LAOAG CITY – Inrakurak ni United States President Donald Trump ti plano a pannakaipasdek ti Navy battleships nga ipanagan kenkuana iti babaen ti “Golden Fleet” plan.
Inaramid ti Presidente ti Amerika ti anunsio iti Mar-a-Lago residence-na iti estado ti Florida.
Inbatad ni Trump, ti baro a Trump-class ships ket agbalin a kadakkelan a barko a panggubat iti pakasaritaan ti Amerika ken kadakkelan a battleship nga ipatakder iti pakasaritaan ti intero a lubong.
Kunana a manamnama a marugian iti kabiitan a panawen ti pannakaipasdek iti Trump Class USS Defiant ships nga addaan kadagiti heavy weapons kas ti nuclear-armed cruise missiles nga al-alisto ken 100 a daras a napigpigsa.
Naammoan nga inisyal a rugian ti pannakaipasdek ti dua a baro a battleship ken plano a manayonan daytoy ti agingga iti 25.
Innayon ni Trump nga agbalin nga operational dagiti barko a panggubat iti uneg ti dua ket kagudua a tawen.
Kabayatanna, paset ti nasao a plano ti naig-iget pay nga addang para iti pannakaipalawa pay ti United States Navy ti manned ken unmanned vessels-da pakairamanan ti dadakkel a barko a panggubat nga armado ti missile ken babassit a barko.
