LAOAG CITY – Kalikagum ni United States President Donald Trump a makita ni North Korean leader Kim Jong Un para iti mapaspasangasangan nga Asia trip.
Nangaramid ti pakasaritaan ni Trump idi umuna a terminona gapu ta isuna ti nagbalin nga immuna a Presidente ti Estados Unidos a nagturong idiay North Korea idi 2019.
Mainaig iti daytoy, silulukat ni Kim a makitaripnong manen ken ni Trump mainaig iti nuclear weapons ti North Korea.
Inrakurak ni South Korea’s Unification Minister Chung Dong-young a mangig-iggem iti relasion iti nagbaetan ti North ken South nga adda ti posibilidad nga agkita ti dua a lider kabayatan nga adda ni Trump iti South Korea para iti Asia-Pacific Economic Cooperation (Apec) forum.
Makipagkita ni Trump kadagiti world leaders pakairamanan ni China’s Xi Jinping idiay Malaysia ken Japan maipanggep iti trade negotiations.
Naammoan nga umuna nga agturong ni Trump idiay Malaysia no sadinno nga agatendar iti Association of Southeast Asian Nations (Asean) summit.
Kabayatanna, manamnama a sumangpet ni Trump idiay South Korean city Busan inton Mierkoles sakbay ti Asia-Pacific Economic Cooperation summit a makataripnongna ni South Korean leader Lee Jae Myung tapno talantanen mainaig iti Korean peninsula.
