LAOAG CITY – Nakaawat ti pammabalaw ni United States President Donald Trump kalpasan a nangipakita ti maysa a racist video a mangiladladawan kada dati nga United States President Barack Obama ken dati a First Lady Michelle Obama kas sunggo nga insigida met nga inikkat iti Truth Social account-na ken naglikudanna a nakitana ti nasao a clip.
Ti video ket immuna a nai-post idi Huebes a nangitunda ti panagpungtot manipud kadagiti agsumbangir a takder ti United States political spectrum.
Naipakita ti agarup maysa a segundo a paset ti video ti rupa ti agasawa nga Obama a naikabil kadagiti bagi dagiti sunggo kas paset ti at-atiddog a video a mangitantandudo ti conspiracy theories mainaig iti maipagarup a panagswitik iti 2020 United States presidential election.
Naglikudan ti White House idi damo dagiti pammabalaw ken inawaganna a “fake outrage.”
Inbatad ni White House Press Secretary Karoline Leavitt, ti video ket paset laeng iti maipagarup a maysa nga internet meme.
Nupay kasta, kalpasan ti sumurok 12 nga oras, inbabawi ti administrasion ti pammabalaw ken inadmitirna nga staff member-da ti nagbiddot a nag-post.
Iti interview ken ni Trump, kunana a saanna a nabuya ti sibubukel a video sakbay daytoy a nai-post.
Awan pay ti rakurak ti kampo ti agasawa nga Obama mainaig iti insidente.
Kabayatanna, naiget a kinondenar dagiti Democrats ti post.
Inawagan ni House Minority Leader Hakeem Jeffries ni Trump a “vile, unhinged and malignant” ken ginutigotna dagiti Republican a kondenaren ti bigotry ti Presidente.
Maipalagip a rinugian ni Trump ti political rise-na iti babaen ti panagwaras ti racist “birther” conspiracy theory kontra ken ni Obama.
Iti maikadua a terminona, agtultuloy latta nga agus-usar ti AI-generated ken manipulated visuals iti social media a nangdegdeg kadagiti kritikona.
Immuna iti daytoy, indauluan ni Trump ti kampania kontra iti diversity, equity and inclusion (DEI) programs a nangitunda ti civil rights movement nga inmatonan dagiti Black Americans kalpasan ti naunday a pakasaritaan ti slavery ken institutional racism idiay Estados Unidos.
