LAOAG CITY – Naminsan manen a pinangtaan ni United States President Donald Trump dagiti Houthis rebels iti Yemen ken dagiti kaalyadoda nga Iranian a rautenda dagitoy.
Inbatadna a mangiwayat ti Estados Unidos ti napigsa nga airstrikes agingga nga agsardengda iti ar-aramidenda a panangraut kadagiti barko.
Inlawlawagna a saan nga agsardeng agingga a maawan ti pangta iti Freedom of Navigation.
Nupay kasta, inpettengna nga agsardengda met iti kanito nga isardeng dagiti Houthis kadagiti barko ti Estados Unidos.
Immunan a nagpangta dagiti Houthis wenno dati nga am-ammo kas Ansar Allah nga itultuloyda ti panagrautda iti Israel ken shipping lanes iti Red Sea agingga nga isardeng dagiti suldado ti Israel ti panangrautda iti Gaza.
Kabayatanna, nakasagana latta ti Iran a manglaban iti panangraut ti Estados Unidos kontra kadakuada.
