LAOAG CITY – Inpakammu ni dati a United States President Donald Trump a planona ti agsubli idiay Butler, Pennsylvania – ti lugar a nakapasamakan ti assassination attempt kontra kenkuana.
Kunana a kalikagomna ti agsubli para iti rally padayawan na ti napapatay a supporter a ni Corey Comperatore ken dagiti nasugatan iti pannakapaltog.
Nu pay kasta, saan met pay nga inyanunsio ni Trump nu inton ano nga agsubli daytoy iti nasao a lugar.
Malakdid iti pammadayaw iti natay ken dagiti nasugatan a supporter na, pinadayawan pay ti dati a presidente ni Comperatore, maysa a boluntario a bombero a nangsalaknib iti asawana ken dagiti annakna manipud iti panagputok ti paltog.
Maipalagip a sumagmamano laeng a minuto ti panagbitlana ni Trump idi Hulio 13 idi pinaputokan ti maysa a gunman isuna, no sadinno a natamaan ti makannawan a lapayagna.
Kabayatanna, agtultuloy pay laeng ti imbestigasyon, nangruna no kasano a nakaasideg ti gunman iti nakaangayan ti rally.
