LAOAG CITY – Naiyetnag ti tsunami alert kalpasan a dinayyeg ti magnitude 8.8 a gingined iti akin-daya a kabaybayan ti Kamchatka idiay Russia.
Basar iti United States Geological Survey, ti gingined ket adda ti kaunegna a 19 a kilometro ken mapattapatta a 136 a kilometro iti daya iti siudad ti Petropavlovsk-Kamchatsky.
Gapu iti kinapigsa ti gingined, nangiparuk-at ti tsunami advisory dagiti otoridad idiay Japan, Alaska, Hawaii ken sumagmamano a paset ti Pacific Islands.
Segun iti Japan Meteorological Agency, posible a mapasaran ti tsunami nga adda ti kangatona a maysa a metro kadagiti sumagmamano a kabaybayan idiay Japan.
Nadadael ti sumagmamano a pasdek idiay Russia pakairamanan ti maysa a kindergarten no sadinno a natalged a naisalakan dagiti tattao sakbay a narpuog dagiti pader.
Nangiruar met ti tsunami watch ti Hawaii Emergency Management Agency kas panagan-annad iti posible nga aftershock ken epekto iti kabaybayan.
Ti gingined ket paset ti aktibidad iti Kuril-Kamchatka Trench a maysa nga am-ammo a subduction zone iti rehion.
Naammoan nga adda dagiti foreshock sakbay ti gingined pakairamanan ti maysa a magnitude 7.4 a gingined idi Hulio 20.
Naabisoan dagiti residente kadagiti naapektaran a lugar nga agtalinaed a naridam ken sumurot kadagiti pakdaar dagiti otoridad.
Iti agdama, bayat a maisursurat daytoy a damag ket awan ti naipadamag a nadangran wenno pimmusay gapu iti napigsa a gingined.
