Ibilang ni Engr. Mark Villa dela Cruz Vidad a tubo iti ili ti Vintar a ti ama na ti nagbalin nga inspirasyon iti panagturpos na kas summa cum laude iti kurso a Software Engineering idiay McMaster University, Hamilton, Canada.
Segun ken ni Vidad, ipannakel na ti ama na a nagserbi a modelo kenkuana tapno magun-od na dagiti arapa-ap na iti biag.
Inbatad na a nu pay saan a nakapagturpos iti panagadal ti ama na ket nagserserbi daytoy nga opisyal ti barangay ken inaramid na amin a wagas tapno masuportaran na ti panagadal dagiti annakna.
Kuna ni Villa a gapu iti kinasirib ken kinasayaat ti ama na ket ammo na a suruten dagiti desisyon na iti biag nga isu met ti patien na a susik tapno agballigi.
Nu pay kasta, inpakaamo ni Villa a maysa a tawen ti napalabas kalpasan ti panag-migrate na iti Canada ket pimmusay ti ama na.
Kabayatanna, inbunannag ni Vidad a nu pay narigat ti napasaran na idiay Canada gapu ta pinaggedan na ti panagadal ken panagtrabaho ket saanna a napanunotan nga ibbatan dagiti arapa-ap na.
Inpalgak na a ti naiget a nangpatibker ti pakinakem na tapno ituloy na ti panagbasa ket ti pamilya na ken ti pammati na a nu agtalek iti bukod a bagi ket malasatan ti aniaman a pannubok iti biag.
Mainaig iti daytoy, kuna ni Vidad nga iti baet ti panagturpos na ket kalikagum na ti mangala ti PhD ken maaddaan ti bukod na a pamilya.
Ni Vidad ket immunan a nagturpos iti Mariano Marcos State University iti siudad ti Batac kas cum laude iti kurso nga Electronics and Communication Engineering.
