LAOAG CITY – Ilunglungalong ni Trade Union Congress of the Philippines Partylist (TUCP) ti regular a pannakaisayangkat ti earthquake drills iti kada bolan kadagiti pagtrabahoan tapno mapapigsa ti kinasagana dagiti mangmangged iti sangwanan ti pangta ti gingined.
Iti rekomendasyon nga inparuk-at ti Trade Union Congress of the Philippines, ginutigot na dagiti kompanya nga aramiden a kas paset ti workplace safety protocols ti binolan nga earthquake drill.
Basar iti grupo, napateg a maasa dagiti empleyado iti umiso a panagresponde iti panawen ti kalamidad tapno maliklikan ti nakarkaro a perdisyon ken mapagtalinaed ti kinatalged ti amin.
Daytoy ket kalpasan ti nagsasaruno a panagdayyeg iti nagduduma a paset ti pagilian, karaman dagiti napasamak a gingined iti Davao ken Cebu, a nangitunda ti pannakatay ti sumagmamano nga indibidual, pannakadadael dagiti ado nga imprastruktura ken nakaro a panagbuteng ti publiko.
Innayon ti grupo a ti kastoy nga addang ket saan laeng a tapno protehiran dagiti mangmangged no di ket para iti pannakaptibker ti disaster preparedness iti sektor ti negosyo.
Nagpanawagan ti Trade Union Congress of the Philippines Partylist kadagiti employer nga agbalin a proactive iti panangbukel ti natalged ken nakasagana nga aglawlaw iti trabaho.
