LAOAG CITY – Napagbalinen nga 4 a ribo a pisos ti maipapaay a tulong pinansyal kadagiti frontliners ditoy probinsia kalpasan a nanayunan ti sangaribo a pisos.
Daytoy ket paset ti panangbigbig ni Governor Cecilia Araneta Marcos iti trabaho dagiti frontliners ditoy probinsya.
Naamoan nga adda ti nasurok a 18 a ribo a barangay frontliners ditoy probinsia ti maipapaayan iti nasao a tulong pinansyal.
Inlawlawag ti gobernador a tinawen a maipapaayan ti tulong dagiti barangay frontliners nangnangruna iti bulan ti Disiembre kas panagyaman ti gobierno probinsal iti ado a sakripisio ken serbisio nga ipapaay dagitoy kadagiti umili.
Inbatad na a saan a naipaay ti nasao a tulong iti napalabas a bulan gapu iti kaadu dagiti bakasyon ken saan a nairuar iti bangko ti maipaay kadagiti barangay frontliners a tulong pinansyal.
Kuna ti gobernador a no maminsan ket adda met ti pagsayaatanna tapno adda pay laeng ti nabatbati a kuarta dagiti maseknan iti daytoy a panangrugi ti tawen 2026.
Kagiddan iti daytoy, indanon ni Gobernador Marcos ti panagyaman na kadagiti amin a barangay frontliners ken inpasigurado na ti agtultuloy a suporta na ken ti sibubukel a gobierno probinsiak kadagiti amin a barangay frontliners ditoy probinsia.
