LAOAG CITY – Nairubwat ti “Tulong sa Bayan Program” ti National Food Authority (NFA) iti mismo a sangwanan ti kapitolyo probinsyal idi kalman.
Naipatungpal ti nasao a programa babaen ken ni Vice Governor Angelo Marcos Barba ken dagiti pannakabagi ti NFA ditoy probinsya.
Naamoan a babaen ti nasao a programa ket ilako ti Ilocos Norte Millers Association (RMA) dagiti bagas ti nababbaba a presyo babaen ti pannakikamayet da ti NFA.
Gagem pay ti nasao nga addang ket tapno suportaran da ti kalikagom ni Presidente Rodrigo Duterte a maidiaya ti nalaklakan a presyo ti bagas iti publiko kangrunaan na dagiti nakukurapay.
Inbatad ti bise gobernador a napintas ti nasao a programa tapno mabalanse ti presyo ti bagas a mangted tulong kadagiti residente ditoy probinsya.
