LAOAG CITY – Inadmitir ni Barangay Chairman Rufino Malasig, iti Brgy. Paguludan Salindeg, iti ili ti Currimao nga opisyal ti barangay ken sumagmamano a residente ti nagubra para iti Tulong Panghanapbuhay sa Ating Disadvantaged / Displaced Workers (TUPAD) program ti gobyerno.
Daytoy ket kalpasan a dimmanon iti Bombo Radyo ti arungaing dagiti residente a dagiti opisyal ti barangay ti nabenepisyaran ti nasao a programa.
Segun kenni Malasig, sinurot da ti guidelines a saanen a maulit a maikkan ti benepisyo dagiti residente a nakaawat ti tulong pinansyal manipud iti Social Amelioration Program.
Daytoy ti rason a kadagiti opisyal ti barangay ti nakaipatungpalan ti TUPAD program gapu ta saan da a nakaawat ti SAP.
Kuna na nga inyuman da daytoy a banag iti ili ket dita a naawat da ngem no bilang saan a naaprobaran ket saan a nagubra dagiti opisyal ti barangay.
Inbatad na a lima a kagawad, barangay secretary, treasurer ken Barangay Nutrition Scholar agraman dagiti sumagmamano a residente ti nabenepisyaran iti nasao a programa, no sadino nga agdagup iti 11 ti naiyalokar nga slot.
Inpetteng ni Malasig a ti intensiyon na ket makatulong rason a nakita na dagiti frontliner, nga isu ti nakaipatungpalan ti TUPAD program, gapu ta kakaasi da.
Innayon na a saan na a napanunot nga inpadas nga inyuman dagiti possible a kwalipikado a kabarangayan na para iti TUPAD program gapu ta sinurot na ti guideline a saan a mabalin nga agdoble a makaawat dagiti naikkanen iti SAP benefit.
Ti TUPAD program ket para kadagiti mangmangged a napukawan ti trabaho, awanan ti trabaho, ken kadagiti seasonal workers.
